Ошто терминалдан акча уурдоого шектүү Бишкектен кармалды

Ошто төлөм терминалынан акча уурдоого шектүү кармалды. Бул тууралуу бүгүн, 23-январда Ош ОИИБи кабарлады.

Маалыматка ылайык, былтыр 30-ноябрда милицияга Отуз-Адыр айыл аймагынын тургуну А.С. арыз менен кайрылган. Ал 30-ноябрга караган түнү белгисиз адамдар дүкөнүнүн дубалын бузуп киришип, товарларын жана "О!" компаниясынын терминалынан 85 миң сомун уурдап кетишкендигин билдирген.

Бул факты боюнча Кылмыш-жаза кодексинин 205-беренесине (Уурдоо) ылайык кылмыш иши козголгон.

Шектүү катары Жалал-Абад облусунун Сузак районунун 1987-жылы туулган А.Н. аттуу тургуну Бишкек шаарында качып жүргөн жеринен кармалып, камакка алынган.

Тергөөнүн жүрүшүндө шектүүнүн башка 2 кылмыштуу шериктери да бар экендиги жана алар Сокулук районундагы башка уурулук фактылары боюнча шектелип, камакка алынгандыгы аныкталган.

"Шектүүлөр Отуз-Адыр айыл аймагындагы 2 дүкөнгө киришип, 2 акча салуучу терминалдагы акчаларды алышкандан соң видеобайкоо камералардын жазып туруучу түйүнүн чыгарышып, каналга ыргытып жиберишкени аныкталды", - деп айтылат маалыматта.

Учурда тергөө амалдары уланууда.