Алтынбек Максутов Катардын маданият министри менен жолукту

Маданият, маалымат, спорт жана жаштар саясаты министри Алтынбек Максутов Катардын Доха шаарында Кыргызстандын Маданият күндөрүнүн алкагында Катар мамлекетинин маданият министри шейх Абдулрахман бен Хамад бин Джассим бин Хамад Аль Тани менен жолукту. Бул тууралуу аталган министрликтен билдиришти.

Маалым болгондой, жолугушууда тараптар маданият тармагындагы кызматташтыкты кеңейтүү жолдорун талкуулашты.

Ага ылайык, Алтынбек Максутов Катар тарапка жылуу кабыл алуу жана меймандостук мамиле үчүн ыраазычылык билдирип, кыргыз тараптын эки тараптуу маданий байланыштарды бекемдөөгө умтула берүүнү баса белгиледи.

Ал эми Катардын маданият министри өз кезегинде эки тараптуу байланыштарды өнүктүрүүнүн маанилүүлүгү Катардын Эмири шейх Тамим бин Хамад Аль-Танинин 2023-жылы Кыргызстанга болгон мамлекеттик сапарынын алкагында бекемделгенин белгиледи. Министр ошондой эле кыргыздын салттуу маданиятына суктануусун билдирди.

"Аталган жолугушууда тараптар медиа тармагында тажрыйба алмашуу жана Кыргызстан менен Катардын маданияты, тарыхы, каада-салттары тууралуу тасма тартып, эки өлкөнүн элдерине тааныштыруу максатында тиешелүү адистердин өз ара иш сапарларын уюштуруу боюнча макулдашууга жетишти", - деп айтылат маалыматта.