Нурдан Орунтаев: "Бишкектеги бардык имараттар жер титирөөгө туруктуу"

Бүгүнкү күндө Бишкектеги бардык имараттар жер титирөөгө туруктуу. Мындай пикирин Мамлекеттик курулуш агенттигинин жетекчиси Нурдан Орунтаев бүгүн, 24-январда курулуш объектилерине болгон пресс-турдун алкагында билдирди.

Ал Бишкекте мамлекеттик текшерүүдөн өткөн көп кабаттуу үйлөр талапка жооп берерин жана алардын сертификаттары текшерилгенин айтты.

"Комиссиянын жыйынтыгына бардык мүчөлөр кол коюп берген. Анда бизде курулган объектилер бардык коюлган талаптарга жооп берет деген жыйынтыкка келдик. Объектилерди ар кандай инструменттер менен текшерип, бетондордун курамын, ошол жерде колдонулган арматура, материалдардын сертификаттарын карадык.

Булардын чындыгында экспертизадан өткөнүн, Мамкурулуш агенттигине караштуу сертификация кызматынан сертификаттарды алганын ошол жердеги журналдардан бери текшерип, кайсы партия менен кандай келгенин карап чыкканбыз. Бүгүнкү күндө Бишкектеги бардык имараттар жер титирөөгө туруктуу деп айтса болот", - деди ал.

Ошондой эле комиссиянын ичинде Жогорку Кеңештин депутаттары, эл өкүлдөрү жана тиешелүү кызматкерлер болгонун кошумчалады.