Баңгизаттарды мыйзамсыз жүгүртүүгө каршы күрөшүү кызматы жана ички иштер органдарынын аймактык бөлүмдөрү тарабынан республиканын укук коргоо органдары тарабынан катталган баңги кылмыштарынын жалпы санынын 94,6 пайызын ачып, 92,4 пайыздан ашык баңгизаттарын мыйзамсыз жүгүртүүдөн алышкан. Бул тууралуу ИИМдин маалымат кызматынан билдиришти.
Маалым болгондой, үч жылдын ичинде ИИМдин БМЖКККнын кызматкерлери тарабынан мыйзамсыз жүгүртүүдөн 15 тонна 951 килограмм 729 грамм алынган, бул ички иштер органдары тарабынан алынган баңгизаттардын жалпы көлөмүнүн 92,4 пайызын түзөт. Баңгизаттарды мыйзамсыз жүгүртүүгө каршы күрөшүү кызматы акыркы үч жылда баңги каражаттарын жана психотроптук заттарды мыйзамсыз өндүргөн 27 жашыруун лабораторияларды аныктап, жоюп салган.
Ага ылайык, мессенжерлерде, социалдык түйүндөрдө жана башка интернет мейкиндиктеринде баңгизаттарды сатууга тиешеси бар адамдарды аныктоо жана интернетке мониторинг жүргүзүүнүн натыйжасында, үч жыл ичинде эч кандай байланышы жок баңгизатын сатуу боюнча 599 факты жана 39 баңги аттарды тараткан интернет-дүкөндөр аныкталды. Көрүлгөн чаралардын негизинде 20 интернет-дүкөн жоюлган, мындан тышкары баңги заттары тууралуу тыюу салынган маалыматтарды жарнамалоо жүргүзгөн 3 сайт жабылган.
Мындан тышкары, 2021-2023-жылдар аралыгында кызмат тарабынан баңги заттарды мыйзамсыз жүгүртүүгө каршы күрөшүү чөйрөсүндө чет мамлекеттердин компетенттүү органдары жана эл аралык уюмдар менен өз ара аракеттенүүнү мындан ары да бекемдөөгө, ошондой эле жаңы мамилелерди түзүүгө багытталган 180ден ашык эл аралык иш-чаралар өткөрүлгөн.
"Орусиянын, Япониянын жана АКШнын каржылоосу менен БУУнун БКБнын 3 долбоору ишке ашырылууда. Анын алкагында Жалал-Абад жана Талас шаарларында БМЖКККнын аймактык бөлүмдөрү үчүн административдик имараттар курулган. БМЖКККнын ишмердүүлүгүн санариптештирүү жүргүзүлүп, автотранспорт каражаттары жана учкучсуз учуучу аппарат комплекстери сатылып алынды. Аналитикалык борбор түзүлдү, ошондой эле кадрдык потенциал чыңдалып, ченемдик укуктук актылар иштелип чыгып, баңгиликтин алдын алуу боюнча масштабдуу иш-чаралар жүргүзүлдү", - деп айтылат маалыматта.
Ошондой эле ИИМдин Баңгизаттарды мыйзамсыз жүгүртүүгө каршы күрөшүү кызматы Европа Биримдигинин КАДАП-7 программасынын алкагында баңгизаттын алдын алуу, баңгичиликтин абалы боюнча маалыматтарды чогултуу жана өздүк курамдын потенциалын жогорулатуу багытында натыйжалуу кызматташууну жүзөгө ашырат.
Бул программанын алкагында ушул жылы Борбордук Азиядагы биринчи наркотикалык борборду түзүү мерчемделүүдө, ал жаштар арасында баңги заттарды колдонуунун алдын алуу боюнча таптакыр жаңы инструменттерди жана ыкмаларды берүүгө багытталган.
ЕККУ менен кызматташуунун алкагында баңги заттарды контролдоо, баңги заттардын алдын алуу, мыйзамдарды өркүндөтүү жана БМЖКККнын кадрдык потенциалын чыңдоо жаатында мамлекеттик органдардын аракеттерин координациялоону күчөтүү боюнча натыйжалуу өз ара аракеттенүү жүргүзүлүүдө.
Эл аралык милдеттенмелерди аткаруунун алкагында ИИМдин Баңгизаттарды мыйзамсыз жүгүртүүгө каршы күрөшүү кызматы, Кыргызстандын жооптуу мамлекеттик органдары менен биргеликте БУУнун Баңги каражаттар боюнча комиссиясы, БУУ БКБ, ЖККУ, ШКУ, Борбордук Азия аймактык маалыматтык координациялык борбору жана башкалар сыяктуу эл аралык уюмдардын жана аймактык бирикмелердин ишине активдүү катышат.
Супер-Инфо
super.kg видео
