Баткенде аткезчилик жол менен жүк алып өтүүгө аракеттенген бир нече жаран кармалды

Бүгүн, 24-январда мамлекеттик чек арадан аткезчилик жүктү алып өтүү аракеттерине бөгөт коюлду. Бул тууралуу УКМКнын Чек ара кызматынан кабарлашты.

Маалыматка ылайык, Айдаркен чек ара отрядынын чек арачылары Вольво-500 үлгүсүндөгү жүк ташуучу унааны кармашып, анын айдоочусунда жүктү коштогон жалган электрондук документ болгондугун аныкташкан.

"Жасалма коштомо баракты пайдаланып 2004-жылы туулган А.у.А аттуу Баткен облусунун Кадамжай районунун Арпа-Сай айылынын тургуну 7 тонна анарды Өзбекстандан өлкөгө мыйзамсыз алып өтүүгө аракет кылган.

Ошондой эле кыргыз-тажик чек ара тилкесинде Лейлек районундагы Мурас-Достук унаа жолунда Лейлек чек ара отрядынын чек арачылары өлкөдөн Тажикстанга мыйзамсыз жүк алып өтүүгө аракет кылган 1993-жылы туулган Г.М аттуу аталган райондун Жаштык айылынын тургунун кармашкан", - деп айтылат маалыматта.

Мерседес-Бенц үлгүсүндөгү унааны текшерүүдө 3,5 тонна “Миф” кир жуугуч порошогун табышкан. Айдоочуда алып бараткан жүгүнө тийиштүү документтер болгон эмес. Анарлардын жана кир жуугуч порошоктордун баасы болжол менен 1 миллион 500 миң сомду түзөрү айтылат.

Тиешелүү документтер толтурулган соң аткезчилик жүктөр жана кармалган жарандар андан аркы териштирүүлөр үчүн компетенттүү органдардын кызматкерлерине өткөрүлүп берилген.