"Майда жаракалар бар". Аймактарда жер титирөөдөн жабыркаган имараттар текшерилүүдө

Жарандык коргонуу комиссиялары аймактарда жер титирөөдөн жабыркаган имараттарды текшерүүдө. Бул тууралуу бүгүн, 24-январда Өзгөчө кырдаалдар минитстрлигинен билдиришти.

Маалыматка ылайык, табигый кубулуштун кесепетинен жабыркаган имараттар бар.

Ысык-Көл облусунун аймагында 18 социалдык мекеме жана 9 турак үй текшерилип, дубалдарынан майда жаракалар кеткени аныкталган. Ал эми эски 1 турак үй авариялык абалда экени айтылат.

"Нарын облусунун райондоруна комиссиялар тартылып, тактоо жана жергиликтүү тургундарга түшүндүрүү иш-чараларын жүргүзүштү. Облуста 3 социалдык мекеме, 6 үй жана 1 турак жайдын кире бериши текшерилди.

Жалпысынан 2 облустан 21 социалдык мекеменин, 16 үйдүн дубалдарынан майда жаракалар кеткен жана 1 эски үй авариялык абалда. Бүгүн 11 үй Жарандык коргонуу комиссиясынын көзөмөлүнөн өтүүдө", - деп жазылат анда.

Мындан сырткары Чүй облусунун Чүй, Москва райондорунун 2 мектеби текшерилип, мектептин жаракалары жер титирөөгө тиешелүү эместиги аныкталганы айтылат.