Бишкекте 100 күндө үй тибиндеги 36 бала бакча ачылды

Жүз күндө үй тибиндеги 36 бала бакча ачылды. Бул тууралуу Билим берүү жана илим министрлигинен кабарлашты.

Ага ылайык, өлкөдө 2023-жылы биринчи жолу “Өкмөттүк акселераторлор” программасы №1 чакырыгы ишке ашырылды.

Анын алкагында жүз күн ичинде мектепке чейинки билим берүү кызматтарын көрсөтүү боюнча 800 адам окутулуп, анын 570и сертификат алган. Ошондой эле 262 адам жеке ишкер катары катталып, үй тибиндеги 36 бала бакча ачылганы айтылат.

"Жалпысынан жүз күндө 900гө жакын бала мектепке чейинки билим берүү менен камтылды. Программа алгач пилоттук негизде Бишкек шаарынын Арча-Бешик, Ала-Тоо, Ак-Ордо, Ак-Босого, Калыс-Ордо, Мурас-Ордо жаңы конуштарында ийгиликтүү ишке ашырылды", - деп жазылат маалыматта.

Бул жылы “Өкмөттүк акселераторлор” программасы өлкө аймактарында этап-этабы менен жайылтылары кабарланат.