Курманкул Зулушев былтыр прокуратурада канча кызматкер жоопко тартылганын айтты

Прокуратура органдарында ич ара тазалануу тактап айтканда кадрларды алмаштыруу иштери тынымсыз жүрүп турат. Бул тууралуу бүгүн, 31-январда башкы прокурор Курманкул Зулушев былтыркы жылдын жыйынтыгы боюнча маалымат жыйында билдирди.

Анын айтымында, кызматтык тартипти камсыз кылуу үчүн тийиштүү чаралар көрүлүүдө.

"Мыйзам ченемдерди, коом жана мамлекет башчысы тарабынан коюлуп жаткан талаптарды ишке ашырууда коррупциялык көрүнүштөргө жол берген, мыйзамдарды бузган кызматкерлерден арылуу иштери күчөтүлгөн. Анткени бир кызматкер ээлеген кызматында көп жылдап отура берсе ишке жоопкерчиликсиз болуп кызматтык милдеттерин так аткарбай калат экен", - деди Зулушев.

Башкы прокурор кошумчалагандай, былтыркы жылы кызматтык милдеттерин талаптагыдай аткарбагандыгы жана башка прокуратура кызматкеринин кадыр-баркын кетирүүчү иштерди жасагандыгы үчүн 501 кызматкер тартиптик жоопкерчиликке тартылган. Ал эми 10 кызматкер кызматтан алынып, 6сы кылмыш-жаза жоопкерчилигине тартылышты.

Алардын арасында УКМК жана прокуратура дагы аныктаган фактылар бар.