Бишкекте бир күндө эле жол кирени төлөөдө 100дөн ашык бузуу аныкталды

Бишкек шаарындагы муниципалдык транспортто мыйзам бузуулар аныкталууда. Бул тууралуу Бишкек мэриясы кабарлады.

Мэриянын маалыматына ылайык, бир күндө эле 100дөн ашык бузуучулар аныкталган. Тактап айтканда, айдоочулар талонду беришкен эмес же жүргүнчүлөр мурда колдонгон талонду жаңы талон катары өткөрүп беришкен.

Белгилей кетсек, жол кирени төлөө ар бир сапарда зарыл жана транспорттун кире беришинде жүргүзүлүшү керек. Валидатордо төлөмдү ырастоо контролёрлор менен түшүнбөстүктөрдү болтурбоого жана ыңгайлуу жүрүүнү камсыз кылууга жардам берет.

"30-январдан бери жүргүзүлүп жаткан күчөтүлгөн текшерүүлөр каттамдарда жол кире акысы жогорулаганын көрсөттү. Ошентип, бул күнү накталай эмес, ошондой эле накталай төлөмдөрдүн бардык түрлөрү менен жол кирелердин саны 390 миң транзакциядан ашты.

Ушундай текшерүүлөр күн сайын жүргүзүлүп, шаардын муниципалдык транспорт тармагын камтыйт", - деп билдиришти мэриядан.

Контролёрлор укук коргоо органдарынын өкүлдөрү менен активдүү кызматташып, коомдук тартипти жана жүргүнчүлөрдүн коопсуздугун, ошондой эле транспортто эрежелердин жана мыйзамдардын сакталышын камсыз кылышат.

Жаңы тарифке ылайык, автобустарда жана троллейбустарда жүрүү баасы накталай эмес 17 сом, накталай болсо 20 сом. Накталай акча төлөөдө айдоочу талон бериши керек, ал сапардын аягына чейин сакталышы керек.