Бишкекте ЖЭБдеги авариядан улам кайсы райондордо жылуулук берүү токтотулду? Тизме

“Бишкекжылуулукэнерго” ишканасынын директорунун орун басары Шаршенбек Сарыкеев бүгүн, 2-февралда маалымат жыйында ЖЭБдеги жарылуудан улам борбордо канча районго жылуулук берүү токтотулганын айтты.

Анын айтымында, Бишкектин №3, 5, 6, 7, 11, 12 кичи райондоруна жана 8-кичи райондун бир бөлүгүнө, Улан, Көк-Жар кичи райондоруна жылуулук берүү токтотулган.

Ошондой эле калаанын абоненттерине ысык суу берүүдө чектөө киргизилгенин кошумчалады.

“Биз жылуулук берүүнү үзгүлтүккө учуратпаш үчүн ысык суу берүүгө чектөө киргиздик”, - деди Сарыкеев.

Эскерте кетсек, 2-февралда түнкү саат үчтөр чамасында Бишкек жылуулук электр борборунда авария болуп, үч киши жабыркаган. Алардын экөөсүнүн абалы өтө оор экени кабарланды.

ЖЭБдеги авариядан улам калаадагы мектеп жана бала бакчанын бардыгы 6-февралга чейин онлайн окууга өткөрүлүп, Бишкек ЖЭБнин аймагында аварияга байланыштуу өзгөчө кырдаал режими киргизилди.

Ал эми борбордогу кырдаалды президент Садыр Жапаров өзү көзөмөлдөп жатат.