Эне-Сай жаңы конушунун аймагынан ымыркайдын сөөгү табылды 

Алматы көчөсү менен айланма жолдун кесилишинде жаңы төрөлгөн баланын сөөгү табылды. Бул тууралуу бүгүн, 2-февралда Чүй ОИИББинин басма сөз кызматы билдирди.

Маалыматка караганда, 1-февралда саат 17:37 чамасында милицияга Алматы көчөсү менен айланма (объездной) жолдун кесилишинде жаңы төрөлгөн баланын жансыз денеси табылгандыгы тууралуу маалымат түшкөн.

Бул факты каттоого алынып, сотко чейинки териштирүү иштери башталган.

Тийиштүү иштердин натыйжасында 20 жаштагы К.А. аттуу жаран аныкталган. Ал Бишкек шаарындагы үйлөрдүн биринде 7 айлык баланы өлүк төрөгөнүн айткан. Андан соң эмне кылаарын билбей, курбуларынын кеңеши менен баланы кутучага салып, Эне-Сай жаңы конушунун аймагындагы талаага таштаган.

Учурда тийиштүү соттук-укуктук экспертизалар дайындалып, сотко чейинки териштирүү иштери уланууда.