Базар-Коргон районунун архивинин башчысы кармалды

Мамлекеттик каттоо кызматынын алдындагы Архив агенттигинин Базар-Коргон райондук мамлекеттик архивинин башчысы кармалды. Бул тууралуу Жалал-Абад облустук ички иштер башкармалыгы билдирди.

Милициянын маалыматына ылайык, кармалган Ж.К. 2023-жылдын 6-июлунда архивде сакталып турган документти жок кылып, анын ордуна архивдик сактоодо жок буйрукту тиркеген.

Мындан сырткары, сактоодо жок болгон 1999-жылдын 30-мартындагы сатуу жана сатып алуу келишимди 2023-жылдын 10-октябрында көчүрмөнү мөөр менен тастыктап берген. Архивдик көчүрмөнүн негизинде Жер ресурстар кызматынын Базар-Коргон филиалы тарабынан 20 миллион 363 миң сомго бааланган 1,5 гектар жер участогуна болгон жеке менчик укугу жөнүндө мамлекеттик акт даярдалып берилген.

Топтолгон материалдар боюнча Базар-Коргон районунун прокуратурасы тарабынан кылмыш иши козголуп, тергөө аракеттерин жүргүзүү үчүн Базар-Коргон РИИБге өткөрүлүп берилген.

Козголгон кылмыш ишинин алкагында Ж.К. шектүү катары суралып, андан кийин убактылуу кармоочу жайга киргизилген.

Учурда тергөө амалдары жүргүзүлүүдө.