Бишкек ЖЭБдеги жарылууну изилдөө үчүн мамлекеттик комиссия түзүлөт

Бишкек Жылуулук электр борборундагы кырсыкты изилдөө үчүн мамлекеттик комиссия түзүлүп, аны министрлер кабинетинин төрагасынын орун басары Бакыт Төрөбаев жетектейт. Бул тууралуу министрлер кабинетинин төрагасы Акылбек Жапаров ыкчам штабдын жыйынында билдирди.

Маалымдалгандай, жыйындын жүрүшүндө ЖЭБдеги жарылуунун алдын ала себептери такталган. Бирок өкмөттүн маалыматында кайсы себептер экени жазылган эмес.

"Мамкурулуштун директору Нурдан Орунтаевдин маалыматына караганда, имараттын бузулган жерлерин калыбына келтирүүгө 100дөн ашык куруучу тартылды. Жыйында тиешелүү мамлекеттик органдарга медициналык жайларды, реабилитациялык борборлорду жана башка социалдык объектилерди жылуулук менен толук камсыз кылуу сыяктуу тапшырмалар берилди", - деп айтылат маалыматта.

Ошондой эле жарылууну териштирүүгө көмөктөшүү үчүн Орусиядан адистер келе турганы белгилүү болду.