Кыргызстанда майыптык боюнча документ алуу жөнөкөйлөштүрүлөт

Кыргызстанда майыптыкты күбөлөндүрүүдөн өтүү, кайра күбөлөндүрүү жана майыптык фактысын аныктоо жол-жоболору жөнөкөйлөштүрүлөт. Бул тууралуу бүгүн, 3-февралда Эмгек, социалдык камсыздоо жана миграция министрлигинен маалымдады.

Ага ылайык, мурда бул үчүн майыптыгы бар адамдар медициналык-социалдык эксперттик комиссияларга 11 документ топтоп беришсе, эми бир гана документ – амбулатордук карта гана талап кылынат.

"Саламаттык сактоо уюмдары бардык зарыл документтерди санариптештиргенден кийин адам медициналык-социалдык эксперттик комиссияларга 1 жолу гана келиши керек болот. Учурда медициналык-социалдык экспертизаны реформалоо боюнча иштер башталды.

Мындан сырткары реабилитациялоонун жекече программасына, тактап айтканда, майыптыгы барларды ишке орноштуруу, кайра окутуу, жардамдын кошумча түрлөрү менен камсыз кылуу жана башка ушул өңдүү жагдайларды аныктоо иштерине көзөмөл күчөтүлөт", - деп айтылат маалыматта.

Министрлик 2023-2030-жылдары "Жеткиликтүү өлкө" мамлекеттик программасынын алкагында майыптыктын медициналык модели социалдык моделге өткөрүлө турганын кошумчалады.