Энергетика министрлиги элиталык үйлөргө жаңы тариф даярдап жатат

Жылуулукка жана электр энергиясына тарифтерди жогорулатуу маселеси каралат. Бул тууралуу бүгүн, 5-февралда Энергетика министринин орун басары Таалайбек Байгазиев "Биринчи радиого" берген маегинде айтты.

Анын айтымында, энергетика тармагын модернизациялоону кайра каржылоо үчүн тарифтик саясатты өзгөртүү зарыл, анткени азыркы чыгым өзүн актабай жатат. Калк электр энергиясын жана жылуулукту өздүк наркынан төмөн тариф менен алат.

"Электр энергиянын өзүнүн баасы өйдө эле. Биз Бишкекке электр энергиясын социалдык тариф менен сатабыз. Эми мунун баарын карап жатабыз. Азырынча варианттар жөнүндө айтпай эле коёюн, бирок жалпысынан биз ири элиталык үйлөр энергияны өз баасында алганга алып барабыз.

Ал эми жөнөкөй жарандарга социалдык норма менен киргизебиз. Азыр ошондой тариф саясатын даярдап жатабыз. Азыр киргизебиз деп айткан жерибиз жок, бирок иштеп чыгып жатабыз. Тариф саясатын сөзсүз өзгөртүш керек", - деди ал.