Жанар Акаев ЖМКлар жөнүндөгү мыйзам долбоорунун 95 пайызы Орусиядан көчүрүлгөнүн айтты

Депутат Жанар Акаев Министрлер кабинети сунуштаган "Жалпыга маалымдоо каражаттары жөнүндө" мыйзам долбоорунун 95 пайыз Орусиянын мыйзамынан көчүрүлүп алынганын айтты. Бул тууралуу ал бүгүн, 6-февралдагы Жогорку Кеңештин Конституциялык мыйзамдар, мамлекеттик түзүлүш, сот укук маселелер боюнча комитетинин жыйынында билдирди.

Анын айтымында, бул мыйзам долбоору өтө чала иштелген.

"Эгер мыйзам долбоору кабыл алынса журналисттер мамлекеттик кызмат адамдарынан маек алуу, коомчулук талап кылган маселелерди алардан ачыктап берүү дагы татаал болот. Журналисттер облустардагы ар бир мекемеден аккредитациядан өтүп чыгышы керек экен. Анда эч кимди иштетпей эле жаап салалы. Мен бул мыйзам долбоорун анализдеп чыктым. 95 пайыз Орусиянын мыйзамдарынан көчүрүлүптүр. Кээ бир беренелери 94-98 пайызга чейин көчүрүлгөн. Биз мыйзам долбоорун бул боюнча кабыл алганыбыз болбойт. Министрлер кабинетинин журналисттерде анча-мынча жоопкерчилик болушу керек дегени туура. Ага эч ким каршы эмес”, - деди ал.

Ошондой эле Акаев бул мыйзам долбоору кабыл алынса көптөгөн ЖМКлар жабылып каларын айтып, күн тартибинен алып салууну сунуштады.

Жыйынтыгында сунуш депутаттар тарабынан колдоого алынып, күн тартибинен алынды.