Айыл чарба министрлиги Ош жана Баткенде соода-логистикалык борборлорду курууга өнөктөштөрдү чакырат

Суу ресурстары, айыл чарба жана кайра иштетүү өнөр жайы министрлиги кызыкдар компанияларды жана инвесторлорду Ош жана Баткен облустарына соода-логистикалык борборлорду (СЛБ) курууга катышууга чакырат. Бул тууралуу бүгүн, 7-февралда аталган министрликтен билдиришти.

Маалыматка ылайык, долбоор айыл чарба жана кайра иштетүү өнөр жайындагы инфраструктураны өнүктүрүүгө жана жакшыртууга багытталган.

Долбоордун максаты:

- айыл чарбасынын жана кайра иштетүү өнөр жайынын инфраструктурасын жакшыртуу үчүн заманбап соода-логистикалык аймактарды түзүү;

- айыл чарба продукциясын сактоо жана бөлүштүрүү үчүн заманбап аймактарды берүү аркылуу айыл аймактарын өнүктүрүүгө көмөктөшүү;

- долбоордун туруктуу өнүгүүсүн камсыз кылуу үчүн инвестицияларды жана өнөктөштөрдү тартуу.

Өнөктөштүктөрдүн мүмкүнчүлүктөрү:

- соода-логистикалык борборлорду каржылоого жана курууга катышуу;

- жер тилкелерин берүү жана каттоо мүмкүнчүлүгү;

- СЛБнын натыйжалуу иштешин камсыз кылуу үчүн өнөктөштүктөрдү түзүү;

- жеңилдетилген кредиттерди берүүгө мамлекеттик колдоо көрсөтүү.