"Зордук-зомбулук боюнча маалымат тастыкталган жок". УКМК интернетте тараган видеодон кийин Караколдогу аскер бөлүгүн текшерди

Улуттук коопсуздук боюнча мамлекеттик комитети социалдык тармактарга жарыяланган Каракол шаарындагы чек ара бөлүгүндөгү мыйзам бузуулар боюнча Чек ара кызматынын №2028 аскер бөлүгүнүн кызматкери Жылдыз Асанакунованын кайрылуусуна ылайык текшерүү жүргүздү. Бул тууралуу атайын кызматтан билдиришти.

Кабарлангандай, Жылдыз Асанакунова буга чейин да кайрылууда айткан тариздеги арыз берген. Анын негизинде Аскер прокуратурасы менен биргеликте текшерүү жүргүзүлгөн. Жыйынтыгында анын маалыматы тастыкталган эмес.

Ошол эле учурда ушул жылдын 6-февралында интернет желесине жарыялаган кайрылуу боюнча Жоокерлердин энелери комитети, Аскердик прокуратура жана УКМКнын өкүлдөрүнүн катышуусунда кошумча комплекстүү текшерүү жүргүзүлдү.

Документалдуу материалдар изилденип, кызыкдар тараптар менен маектешүү жүргүзүлүп, тиешелүү жайлар текшерилип, аскер кызматкерлеринин кызмат өтөөсү, тамак-ашы, жашоо шарттары, эс алуу шарттары ошондой эле тамак-ашты сактоо, тамак-аш даярдоо жайлары, тиешелүү санитардык-гигиеналык ченемдерди сактоолору текшерилди.

"Жеринде жүргүзүлгөн комплекстүү текшерүүнүн жыйынтыгы менен аскер кызматкери Асанакунованын маалыматы тастыкталган жок", - деп айтылат атайын кызматтын билдирүүсүндө.