Камчыбек Ташиев Кыргыз футбол союзунун президенттигине көрсөтүлгөн жалгыз талапкер болду

Улуттук коопсуздук мамлекеттик комитетинин төрагасы Камчыбек Ташиев Кыргыз футбол союзунун президенти кызматына жалгыз талапкер болду. Аны "Талант" футбол клубу сунуштады.

Аталган уюмдан кабарлашкандай, 7-февралда Шайлоо комитетинин жыйыны болуп, Кыргыз футбол союзунун президенти, биринчи вице-президенти, вице-президенти жана Аткаруу комитетинин мүчөлүгүнө талапкерлердин баштапкы тизмеси каралып, бекитилди.

Талапкерликти көрсөтүү тууралуу табыштама 6-февралга чейин берилиши керек эле.

Ага ылайык, КФСинин вице-президенттигине төрт адам жана аткаруу комитетине кирүүгө 10 киши ат салышууда. Кыргыз футбол союзунун президентин жана аткаруу комитетин шайлоо ушул жылы 19-февралда болот.

Эске салсак, буга чейин Садыр Жапаров УКМК төрагасын футбол союзун катуу көзөмөл кылуу үчүн башкарып берүүнү сунуштаган.