Бишкекте темир жолду кесип өтүүчү эки жол салынат 

Бишкек шаарында унаа тыгындарынын көйгөйүн чечүү максатында Лев Толстой көчөсүнө чыгуучу темир жол аркылуу Фучик жана Бакаев көчөлөрүн бойлото жолдорду куруу боюнча иштер башталды. Бул тууралуу шаардын мэриясынан билдиришти.

Маалымдалгандай, ишти баштоо буйругун калаа башчысы Айбек Жунушалиев "Кыргызтемиржол" ишканасынын жетекчилигинин жана башка мамлекеттик органдардын катышуусунда өткөн көчмө жыйында берди.

"Бүгүнкү күндө темир жол шаарды эки бөлүккө бөлүп турат. Учурдагы эстакадалар шаардын түштүк жана түндүк бөлүктөрүнүн ортосунда жетиштүү транспорттук байланышты камсыздай албайт. Буга байланыштуу Лев Толстой көчөсүнө чыгуучу темир жол аркылуу Ю. Фучик Лев Толстой көчөсүнөн Товарный көчөсүнө жана Бакаев көчөсү менен Лев Толстой көчөсүнөн Бөкөнбаев көчөсүнө чейин жолдорду куруу пландаштырылууда", -деп айтылат билдирүүдө.

Мэрия көчөлөрдүн эки тарабына тең тротуар түшөрүн, келечекте бул жолдорду Түштүк магистралга чейин узартуу пландалып жатканын кошумчалады.