"100 миңге жакын адамды тейлей алат". Бишкекте асма жол кайсы жерге курулары айтылды

Бишкекте Манас проспектиси аркылуу Түштүк магистралдан Жибек Жолу проспектисине чейин асма жол куруу пландалууда. Бул тууралуу Бишкек мэри Айбек Жунушалиевдин 100 күндүк ишинин отчётунда айтылды.

Белгиленгендей, бул курулуштун бир варианты болуп эсептелет. Долбоор боюнча асма жолдун узундугу 6 чакырымды түзүп, шаардык бюджеттин, инвестиция жана насыялардын эсебинен каржыланат.

Муниципалитеттин божомолуна ылайык, асма жол күнүнө 50 миңден 100 миңге чейин адамды тейлей алат.

Куруу иштерин ушул жылдын орто ченинде баштап, кийинки жылдын аягына чейин бүтүрүү пландалууда.

Эске салсак, быйыл 30-январда калаа башчысы Швейцариянын Bartholet Swiss президенти менен жолугушкан. Анда тараптар аталган долбоордун планын ишке ашыруу боюнча макулдашууга кол койгон.