Эмгек министрлиги толугу менен электрондук документ жүгүртүүгө өттү

Эмгек, социалдык камсыздоо жана миграция министрлиги толугу менен электрондук документ жүгүртүүгө өттү. Бул тууралуу министрликтин маалымат кызматынан кабарлашты.

Маалымдалгандай, электрондук документ жүгүртүүгө өтүү бардык процесстер жана милдеттер электрондук документ жүгүртүүнүн мамлекеттик системасы (ЭДМС) аркылуу ишке ашырылышын билдирет.

Ага ылайык, бул система мамлекеттик органдарда, жергиликтүү администрацияларда, мамлекеттик ишканаларда жана мекемелерде документтерди алмашууну автоматташтыруу, бардык документтерди электрондук форматка өткөрүү максатында иштелип чыккан.

"Автоматташтырылган маалыматтык системаны (АМС) киргизүү каттарды жана башка кагаз корреспонденцияларды жөнөтүү жана жеткирүү убактысын бир кыйла кыскартты.

Мындан тышкары, аткаруу тартибин жакшыртууга жана документтерди иштеп чыгууну стандартташтырууга мүмкүндүк берди. Электрондук системаны колдонуунун аркасында документтер менен иштөө эффективдүү жана ачык-айкын болуп калды", - деп айтылат маалыматта.