"Арам иштерге барышат". Депутат 14-февраль сүйүү күнүн жокко чыгарууну сунуштады

Кыргызстанда 14-февраль сүйүү күнү майрамдалбашы керек. Бул тууралуу Жогорку Кеңештин бүгүн, 15-февралдагы жыйынында депутат Мейкинбек Абдалиев айтты.

Депутаттын айтымында 14-февраль сүйүү күнүндө жаштар жаман иштерге барып жатышат.

"Кечээ, 14-февраль күнү Кыргызстаныбызда өмүрү биздин тарыхыбызда болбогон, биздин салтыбызга, наркыбызга туура келбеген сүйүшкөндөр күнү деген майрам болуп өттү. Капа болбоңуздар мен катуу эле айтайын, бул шайтандын майрамы. Канча деген жаштарыбыз арам иштерге, жаман иштерге барышты. Канча деген жигиттерибиздин чөнтөгүнө зыян болду. Сүйүшмөк тургай канчасы кечээ күнү "Эмнеге сен куттуктабадың" деп урушту.

Мына мен 14-февраль 2011-жылы үйлөнгөм. Анда "День валентиндин" "В"сы дагы жок болчу. Биз өкмөт менен биргеликте кыргыздын салтына туура келбеген ушундай чоочун нерселерди жокко чыгарышыбыз керек", - деди ал.