Бишкекте коомдук транспорттордо көзөмөл күчөтүлөт

Бишкекте “Тулпар” системасынын адистери жеңилдетилген карталарды колдонууга активдүү көзөмөл жүргүзүүдө. Бул тууралуу Бишкек мэриясынан билдиришти.

Маалым болгондой, адистер 10 күндүн ичинде борбор калаадагы 2 миңден ашык автобус жана троллейбустарды ийгиликтүү текшерүүдөн өткөрдү.

Текшерүүнүн жыйынтыгында 12 жеке менчик жана мектеп карталары мыйзамсыз пайдаланылгандыгы аныкталды.

Белгилей кетсек, мыйзамдарга ылайык, көзөмөлдөөчү кызматкерлер картанын туура эмес пайдаланылганын аныктаса, аны алып коюуга мыйзамдуу укугу бар. Ошондой эле мындай карталар дароо блоктолот.

Ага ылайык, Бишкек мэриясы жүргүнчүлөргө транспортко кирүүдө жол кире акысын төлөп, контролерлор менен түшүнбөстүктөрдү болтурбоо үчүн валидатордогу жашыл белгини күтүү зарылдыгын эскертет.

Киргизилген жаңы тарифке ылайык, автобус жана троллейбустарда жол кире баасы накталай эмес төлөмдөр үчүн 17 сом, накталай төлөмдөр үчүн 20 сом. Накталай акча менен төлөөдө айдоочудан талон берүү талап кылынат, ал жолдун аягына чейин сакталууга тийиш.