"Кумтөр Голд Компани" алтынды жер астынан казууга өттү

Министрлер кабинетинин төрагасынын биринчи орун басары Адылбек Касымалиев "Кумтөр" кенинде алтынды жер астынан казып алуу долбоорунун башталышына старт берди. Бул тууралуу бүгүн, 15-февралда өкмөттүн маалымат кызматы кабарлады.

Маалым болгондой, жаңы ыкма менен иштөөгө онлайн старт берилген.

Анда Касымалиев кенди казуунун мындай ыкмасы алтын өндүрүүнү көбөйтүүгө, ошондой эле экологияга, анын ичинде мөңгүлөргө тийгизген терс таасирин азайтаарын белгилеген.

Ал эми "Кумтөр Голд Компанинин" президенти Алмазбек Барыктабасов алтынды жер астынан казып алуу боюнча адистер тарабынан иштелип чыккан техникалык-экономикалык негиздеме анын экономикалык натыйжалуулугун көрсөтүп турарын билдирген.

Ошондой эле маалыматта жер астынан казуу ыкмасын колдонуу менен 115 тонна алтын алууга болору айтылат.