ИИМ дагы бир жолу кыргызстандыктардан алыс жолго чыкпай турууну суранды

Аба ырайынын туруксуз шарттарына байланыштуу Ички иштер министрлиги айдоочуларды жолдо жүрүүдө этият болууга, ылдамдыкты азайтууга, каптал аралыгын жана аралыкты узартууга чакырды.

Айдоочулардын коопсуздугу жана ыңгайлуулугу үчүн Бишкек-Ош унаа жолунун боюндагы “Сосновка” жана “Чычкан” постторунда, Төө-Ашуу жана Ала-Бел ашууларында 500 метр аралыкка чектөөлөр киргизилди. Ошондой эле жол кыймылынын коопсуздугун камсыздоо кызматкерлери тарабынан кар тазалоочу техникаларга да жардам көрсөтүлүп, жолдун кооптуу тилкелериндеги кыймылды жарым-жартылай жаап жатышат.

"Урматтуу айдоочулар! Аба ырайынын туруксуз шарттарына көңүл буруңуз. Коопсуздугуңуз үчүн узак сапарга чыгуудан убактылуу баш тартууну сунуштайбыз. Учурда Каракол-Эңилчек автожолу 20-февралга чейин жабылды. Ошондой эле Мырза-Аке-Кара-Кулжа-Алайкуу унаа жолунун 45 чакырымынан 130 чакырымына чейинки тилкелеринде убактылуу чектөөлөр киргизилди", - деп билдиришти ИИМден.

ИИМ дагы бир жолу тоолуу райондордон жана ашуулардан өткөн айдоочуларды күрөктөр менен кар чынжырларын алып жүрүүгө, жол эрежелерин так сактоого, тактап айтканда каршы тилкеге чыкпоого жана кар тазалоочу техниканын ишине тоскоол болбоого чакырат.