Шакиев WorldSkills Kyrgyzstan жумушчу кесиптердин улуттук чемпионатынын ачылыш аземине катышты

Бүгүн, 20-февралда Жогорку Кеңештин төрагасы Нурланбек Шакиев WorldSkills Kyrgyzstan жумушчу кесиптердин улуттук чемпионатынын ачылыш аземине катышты.

Парламенттин басма сөз кызматынан билдиргендей, ширетүүчүлүк, ашпозчулук жана мода технологиясы боюнча кесиптик лицейлерде жана колледждерде окуган окуучулар арасында өтө турган сынак эки күнгө созулат. Сынактын жеңүүчүлөрү сентябрь айында Франциянын Лион шаарында өтө турган эл аралык мелдешке катышуу мүмкүнчүлүгүнө ээ болот.

Белгилей кетсек, WorldSkills International – эл аралык ассоциация катары жумушчу кесиптерди өнүктүрүү, кесиптик даярдоонун макамын жогорулатуу максатында бүткүл дүйнө боюнча эл аралык мелдештерди өткөрүп келет. Аталган мелдешке быйыл Кыргызстан алгач ирет катышууда.