УКМК дагы бир аткаминер менен кызматкерди кармады

"Унаа" мамлекеттик ишканасынын бөлүм башчысы жана адиси кармалды. Бул тууралуу УКМК кабарлады.

Маалыматка ылайык, "Унаа" мамлекеттик ишканасынын адистери коррупциялык схеманы уюштуруп, анда жеке адамдар кузовдун жана кыймылдаткычтын айрым тетиктери деген шылтоо менен унааларды алып келүү менен алектенишкен. Бул аларга импорттук бажы жыйымдарын кыйла азайтууга мүмкүндүк берген. Бирок ушундай жол менен алынып келинген автоунааларда каттоого туруу үчүн баштапкы документтери болгон эмес.

"Буга карабастан "Унаа" мамлекеттик ишканасынын башчысы жана адистери материалдык пайда алуу максатында акыркы бир нече жыл аралыгында Кореядан автотранспорт каражаттарын ташып келүү менен алектенген жеке адамдар менен тил табышып, баштапкы документтери жок 600дөн ашык автоунаа каражаттарын өлкөнүн аймагына каттоого алышкан. Натыйжада, мамлекеттик бюджетке миллиондогон долларлык зыян келтирилген", - деп билдиришти УКМКдан.

Сотко чейинки өндүрүштүк материалдарынын алкагында коррупциялык схема түзүүгө тиешеси бар деп, "Унаа" мамлекеттик ишканасынын Кызыл-Кыя бөлүмүнүн башчысы К.А.Т. жана "Унаа" мамлекеттик ишканасынын адиси К.Т.Н. кармалып, УКМКнын убактылуу тергөө абагына киргизилген.

Учурда "Унаа" мамлекеттик мекемесинин бул ишке тиешеси бар башка кызматкерлерин аныктоо жана жоопкерчиликке тартуу боюнча тергөө ыкчам иш-чаралары жүргүзүлүүдө.