ТИМ: "Казакстанда жол кырсыгына кабылгандар өлкөгө алып келинди"

Кечээ, 21-февралда Казакстанда жол кырсыгына кабылгандар өлкөгө алып келинди. Бул тууралуу Тышкы иштер министрлигинен билдиришти.

Маалыматка ылайык, Кыргыз жарандарынын катышуусундагы кырсык ушул жылдын 10-февралында коңшу өлкөнүн Кызылорда облусунун Арал районунда болгон.

"Кыргызстандын Алматы шаарындагы Башкы консулдугу жана Шымкент шаарындагы Ардактуу консулдугу жол кырсыгына кабылган Кыргыз жарандарын Шымкент шаарындагы кыргыз диаспорасы менен тыгыз кызматташтыкта мекенине ийгиликтүү алып келишти", - деп айтылат билдирүүдө.

Жол апаатынан жабыркаган мекендештер андан ары зарыл медициналык жардам алуу үчүн Кордай менен чектешкен "Ак-Жол - автодорожный" өткөрмө пунктунда Саламаттык сактоо министрлигинин өкүлдөрүнө өткөрүлүп берилгени кошумчаланды.