Нарында тоют таңкыстыгын алдын алуу үчүн 191 тонна жем-чөп даярдалды

Нарын жана Ат-Башы райондорунда кургак чөптүн жана жемдин кору камдалууда. Бул тууралуу Өзгөчө кырдаалдар министрлигинен билдирди.

Маалымдалгандай, аталган министрлик Бириккен Улуттар Уюмунун Дүйнөлүк азык-түлүк программасынын алкагында кыш мезгилинде тоют тартыштыгын жөнгө салуу максатында алгачкы пилоттук долбоорун Нарын облусунан баштады.

"Нарын жана Ат-Башы райондорунда кургак чөптүн жана жемдин кору камдалууда. Даярдалган тоюттар аталган райондордо малдын жутчулугу же ар кандай өзгөчө кырдаал катталган учурда тургундарга, малчыларга берилет. Бирок тоютту алган тарапка кийинки жылы кайтарып берүү талабы коюлат", - деп айтылат министрлик тараткан маалыматта.

Долбоордун алкагында Ат-Башы районунун Баш-Кайыңды айыл аймагына караштуу Өзгөрүш айылынын кампасына – 74 тонна жем, 77 тонна чөп түшүрүлүп, ал эми Эмгекчил айылында 40 тоннадан жем-чөп кору даярдалганы кабарланды.