“Үмүт үйү” социалдык стационардык мекемесинде “Эр жүрөк жоокер” сынагы болду

“Үмүт үйү” социалдык стационардык мекемесинде улуу муундун арасында “Эр жүрөк жоокер” сынагы болуп өттү. Бул тууралуу бүгүн, 23-февралда Бишкек мэриясынан билдиришти.

Маалым болгондой, камкордукка алынгандардын жана борбордун кызматкерлеринин катышуусунда майрамдык мелдеш уюштурулду.

"Бардык катышуучулар тапшырмаларды активдүү аткарып, татыктуу сыйлыкка ээ болушту.

Командалар көркөм оюн-зоок, викториналар жана аскердик темадагы салаттарды тартуулашты",-деп айтылат маалыматта.

Ага ылайык, катышуучулар танкисттердин, флоттун, десантчылардын кийимдерин жана Манастын кырк чоросунун кийимин кийишкен. Калыстар тобу баа берип, жеңүүчүлөрдү аныкташты.

Маалымат үчүн: Бүгүнкү күндө “Үмүт үйү” социалдык стационардык мекемесинде 209 адам жашайт. Мекеменин бардык тарбиялануучуларына социалдык, медициналык, турмуш-тиричилик кызматтары акысыз көрсөтүлөт. Алар кийим-кече, бут кийим жана биринчи керектүү буюмдар менен толук камсыз кылынган.