"Ош базарда" 2 баштык аялдардын ич кийими уурдалган. Шектүү кармалды (видео)

"Ош базардан" 2 баштык ич кийим уурдаган шектүү кармалды. Бул тууралуу бүгүн, 26-февралда Ленин РИИБинен билдиришти.

Маалыматка ылайык, 24-февралда Ленин РИИБге Б.К. аттуу жаран арыз менен кайрылган. Ал 11-февраль күнү белгисиз адам Бейшеналиева менен Киев көчөлөрүнүн кесилишинде жайгашкан соода борборунун ичинен 93 миң сомдук товарын уурдап кеткенин билдирген. Ал товар аялдардын ич кийими болгон.

Бул факты боюнча Кылмыш-жаза кодексинин 205-беренесине (Уурдоо) ылайык кылмыш иши козголгон.

Шектүү катары 1993-жылы туулган К.М. аттуу жаран кармалып, Бишкек ШИИББнин убактылуу кармоочу жайына киргизилген.

Учурда анын ушул сыяктуу кылмыштарды жасоого катыштыгы бар экендиги такталууда.