"Кумтөр" былтыр 13 тоннадан ашык алтын саткан

"Кумтөр Голд Компани" жабык акционердик коому былтыр 13 тонна 577 килограмм алтын саткан. Бул тууралуу маалыматты аталган компания өз сайтына жарыялады.

Маалыматка ылайык, ишкананын өткөн жылдагы жалпы кирешеси пландагы 734,2 миллион доллардан көп болуп, 849 миллион долларды түзгөн. Ал эми таза кирешеси 302,4 миллион долларды түзгөн.

Ишкана мамлекеттик бюджетке салык жана башка төлөмдөр түрүндө 17 миллиард 241 миллион 71 миң сом которгон.

"Мындан тышкары "Кумтөр Голд Компани" тарабынан "Ысык-Көл облусун өнүктүрүү" фондуна 8 миллион 389 миң доллар, Нарын облусун өнүктүрүү боюнча "Теңир-Тоо" фондуна 5 миллион 33 миң доллар, аймактарды өнүктүрүү боюнча өнөктөштүк фондуна 1 миллион 597 миң доллар, жаратылышты өнүктүрүү фондуна 1 миллион 542 миң доллар которулган", - деп айтылат маалыматта.