Бишкекте таштанды ыргыткан бир катар компанияларга айып салынды

Бишкек шаарында муниципалдык инспекциянын кызматкерлери тарабынан таштандыларды туура эмес жерге таштоо фактыларын аныктоо боюнча рейддик иш-чараларды жүргүзүштү. Бул тууралуу Бишкек мэриясынан билдиришти.

Ага ылайык, рейддин жыйынтыгы менен бир катар чарбалык субъектилерге карата протоколдор түзүлдү.

Тартип бузгандардын тизмеси:

— Курманжан Датка, 266 дарегиндеги «Нова мед» жеке клиникасына таштандыларды туура эмес ыргыткандыгы үчүн 23 миң сом айып салынды;

— Курманжан Датка, 266/4 дарегиндеги «Компаньон Банкына» таштандыларды туура эмес жерге ыргыткандыгы үчүн 17 миң сом айып салынды;

— Махатма Ганди, 91 дарегиндеги «Газпром нефть» ЖАКына таштандыларды туура эмес жерге ыргыткандыгы үчүн 17 миң сом айып салынды;

— Фучик көчөсү, 15 дарегиндеги «Интермедикал» ЖАКына таштандыларды туура эмес жерге ыргыткандыгы үчүн 17 миң сом айып салынды;

— Жибек-Жолу, 183 дарегиндеги «Кофе и Точка» кафесине жанаша жайгашкан аймакта тазалыкты жана тартипти сактабагандыгы үчүн 13 миң сом айып салынды.

— Фучик, 86 дарегиндеги «Бишкек Петролеум» ЖАКтын май куюучу жайы, таштандыларды туура эмес жерге ыргыткандыгы үчүн 13 миң сом өлчөмүндө айып салынды;

— Курманжан Датка, 304 дарегиндеги «Стронг» ЖАКсынын фитнес залына таштандыларды туура эмес жерге таштаганы үчүн 17 миң сом айып салынды;

— «Лев» тез тамактануучу жайына таштандыларды туура эмес жерге ыргыткандыгы үчүн 17 миң сом айып салынды;

— таштандыны туура эмес жерге ыргыткан ишкер А.Белековго 5500 сом айып салынган.

Белгилей кетсек, Укук бузуулар жөнүндө кодекстин 115-беренесинин 1-2-бөлүгүнө ылайык белгиленбеген жерлерге таштанды таштагандыгы үчүн 5 миң 500 сомдон 17 миң сомго чейин айып пул каралган.

Мындан тышкары, Бишкек шаарын көрктөндүрүү эрежесинин 4/2 бөлүгүнө ылайык менчик түрүнө карабастан чарба субъектилери жанаша жайгашкан аймагын радиусу 10 метр аралыкта тазалык эрежелерин сактап туруусу зарыл. Укук бузуулар жөнүндө кодекстин 114-беренесине ылайык, эрежелерди сактабаган адамдарга 3 миң сомдон 13 миң сомго чейин айып салынат.