Өлкөдө 144 күрөөкананын лицензиясы убактылуу токтотулду

Кыргызстанда 144 күрөөкананын лицензиясы убактылуу токтотулду. Бул тууралуу Жогорку Кеңештин жыйынында финансы рыногун жөнгө салуу жана көзөмөлдөө мамлекеттик кызматынын төрагасы Марат Пирназаров билдирди.

Анын айтымында, ломбарддарды текшерүүгө мораторий киргизилген. Быйыл ал узартылды.

"Бирок буга карабастан келип түшкөн арыздардын негизинде иш-чаралар жүргүзүлүп, анын жыйынтыгында ломбарддарга айып пул салынды. Мындан тышкары, 144 ломбарддын лицензиясы токтотулуп, 10 күрөөкананыкы жокко чыгарылды. Ошондой эле ломбарддарга жазма буйруктар берилип жатат", - деди Марат Пирназаров.

Ал ошондой эле ломбарддар ишкердиктин бир түрү экенин белгилеп, ишкерлерди текшерүүгө мораторий киргизилгенде ломбарддар да бул нормага кирерин кошумчалады.

Ал эми экономика жана коммерция министри Данияр Амангелдиев кыргызстандыктар көбүнчө күрөөгө транспорт, тиричилик техникасын, смартфондор жана зер буюмдарды коюшарын айтты.