Чоң Чүй каналынын жээгинен кийимдери табылган Асел: Кыз билдирүү калтырганы маалым болду

15-февралга караган түнү Кант шаарында 19 жаштагы Асел дайынсыз жоголгон. Анын кийими Чоң Чүй каналынын жээгинен табылган.

Кыздын атасы "Сокол Медиага" окуя кандай болгонун айтып берди. Анын айтымында кызын турмуш жолуна узатканына 2 эле ай болгон.

"Бул окуя түнкү саат 01:30 чамасында болуптур. Үйүндө күйөөсү менен чатакташа кетсе керек. Ошону менен сыртка чыгып кетип, дайыны жок. Чоң Чүй каналынын жээгине келип, курткасы, телефону, бут кийими ушул жакта калыптыр. Ошондон бери дайыны жок.

Эң биринчи кайнагасы аркасынан келип көрүптүр, анан милиция чакырышыптыр", - деди ал.

Ошондой эле ал кызы вотсапп аркылуу "Мен өлсөм Адылдан (күйөөсү) көргүлө" деп билдирүү жибергенин айтты.

"Турмушка узатканыма эки ай эле болгон. Эки жыл сүйлөшүп жүрүшүп, анан үйлөнүшкөн", - деди кыздын атасы.