Казакстан Кыргызстанга гумжардам катары 2 миң тонна дизель жөнөттү 

Казакстан Кыргызстанга гуманитардык жардам иретинде 2 миң тонна дизель майын жөнөттү. Бул тууралуу Энергетика министрлиги маалымдады.

Маалыматка караганда, тапшырманы Казакстандын президенти Касым-Жомарт Токаев берген. Буга чейин гуманитардык жардамдын биринчи партиясы 1000 тонна дизель майы 28-февралда келген эле. Ал эми ушундай эле гумжардамды Түркмөнстан, Өзбекстан, Орусия өлкөлөрү дагы жөнөтүшкөн.

Эске салсак, 2-февралда Бишкек жылуулук электр борборунда авария болуп, беш киши жабыркаган. Учурда кырсыктын себептерин аныктоо боюнча комиссия иш алып барууда.