Коомдук жайда тамеки тарткандарга айып пул үч эсеге жогорулады

Бүгүн, 5-мартта өлкө башчы Садыр Жапаров коомдук жайларда тамеки тартуу үчүн айып пулду көбөйтүүнү сунуштаган мыйзамга кол койду. Бул тууралуу президенттин басма сөз кызматынан билдирди.

Ага ылайык, белгиленбеген жерлерде чылым чеккендерге айып пулдун өлчөмү көбөйтүлөт. Эми эреже бузгандар 1000 эмес, 3000 сом төлөйт.

Ошондой эле 16 жашка чыга элек балдарга тамеки саткан жеке жактарга 5500 сом, юридикалык жактарга - 17 миң сом айып пул салынат.

Тамеки, анын ичинде электрондук чылым чегүүгө ылайыкталган атайын жайларды жергиликтүү бийлик аныктайт. Аэропорт, вокзал жана жумуш орундарында тамеки тартууга тыюу салынат. Бирок бул жакта да чегүү үчүн өзүнчө жайлар болушу шарт.

Мыйзам долбоору депутаттар Улугбек Ормонов, Бактыбек Сыдыков, Элмурза Сатыбалдиев, Акылбек Түмөнбаев тарабынан демилгеленген.

Мыйзам Жогорку Кеңеш тарабынан 25-январда кабыл алынган.