Эмгек министринин эки орун басары кызматтан кетти

Эмгек, социалдык камсыздоо жана миграция министринин 2 орун басары ээлеген кызматынан бошотулду. Бул тууралуу маалымат бүгүн, 11-мартта Министрлер кабинетинин сайтына жарыяланды.

Маалымдалгандай, тиешелүү буйрукка министрлер кабинетинин төрагасы Акылбек Жапаров кол койгон.

Ага ылайык, Нурдөөлөт Базарбаев аталган министрликтин биринчи орун басары кызматынан кетти. Ал бул кызматка былтыр сентябрда дайындалган.

Ошондой эле 2018-жылдан бери эмгек, социалдык камсыздоо жана миграция министринин орун басары кызматын аркалап келген Жаңыл Алыбаева да ээлеген кызматынан бошотулду.