Эскертүү! Бул апта аба ырайы кескин өзгөрөт

13-15-март күндөрү аба ырайы кескин өзгөрүп, көпчүлүк аймактарда жаан, тоолуу райондордо кар жаашы мүмкүн. Бул тууралуу кыргызгидромет борбору билдирди.

Маалыматка карганда, 13-14-мартта түнкүсүн Чүй, Талас, Ош, Жалал-Абад, Баткен облустарынын көпчүлүк аймактарында жаан, тоолуу райондорунда кар, айрым жерлерде жаан-чачын катуу жаашы күтүлөт. Ысык-Көл, Нарын облустарынын айрым жерлеринде жаан, кар, тоолуу райондорунда кар жаайт.

Батыштан келген шамалдын ылдамдыгы секундасына 4-9 метрден, айрым жерлерде 15-20 метрге жетет.

13-15-март күндөрү абанын температурасы төмөндөйт:

Чүй өрөөнүндө түнкүсүн 0…-5° суук, күндүз -1…+4°;

Талас өрөөнүндө түнкүсүн -1…-6°, күндүз -3…+2°;

Ош, Жалал-Абад, Баткен облустарынын өрөөндөрүндө түнкүсүн -3…+2, күндүз +4…+9° жылуу;

Ысык-Көл ойдуңунда түнкүсүн -1…-6, күндүз -3…+2°;

Нарын облусунун дыйканчылык аймактарында түнкүсүн -10…-15°, күндүз -3…-8° суук;

Бийик тоолуу райондордо жана Суусамыр өрөөнүндө түнкүсүн -16…-21°, күндүз -6…-11° суук болушу күтүлөт.

Мындай суук аба ырайы жайыттарда малды кармоону, автоунаа, энергетика жана коммуналдык кызматтардын ишин кыйындатат.