Орусияда кароосуз калган 3 өспүрүм өлкөгө алынып келинди

Орусиянын Новосибирск облусунан кароосуз калган 3 өспүрүм бала алынып келинди. Бул тууралуу Ички иштер министрлиги маалымдады.

Маалым болгондой, алар Жашы жете элек балдардын укук бузууларынын алдын алуу борборуна жайгаштырылган.

Аталган борбор КМШ өлкөлөрүндөгү балдар үйлөрү, жашы жете электерди убактылуу кармоочу жайлары, эл аралык уюмдар менен кызматташат.

Профилактикалык жана тарбиялык иш-чаралар жүргүзүлгөндөн кийин өспүрүмдөр туугандарынын колуна өткөрүлөт. Алынып келинген өспүрүмдөр Ош облусунун Ноокат районунда туулгандыгы аныкталган.

"Кайтарылып берилген жашы жете электердин үй-бүлөдөгү жашоосу жана тарбия шарттарын аныктоо боюнча иштер жүргүзүлүп, башка мамлекеттин аймагында болуу себептери такталды", - деп айтылат маалыматта.