Жапаров Бишкектеги Кырдаалдык борбордун иши менен таанышты

Бүгүн, 12-мартта Министрлер кабинетинин төрагасы Акылбек Жапаров жана Бишкек мэри Айбек Жунушалиев борбор калаадагы "Бишкекавтобекети" муниципалдык ишканасында жайгашкан Кырдаалдык борборго барышты. Бул тууралуу Бишкек мэриясынан билдиришти.

Маалыматка караганда, жаңыдан ишке кирген жол кыймылын башкаруунун автоматташтырылган системасынын жана транспорт видеодетекторлорунун мүмкүнчүлүктөрү, ошондой эле борбордун функционалдык жана техникалык базасы көрсөтүлдү.

Ага ылайык, шаардын көчөлөрүнүн кесилиштерине орнотулган жол кыймылын башкаруучу автоматташтырылган системасынын иши онлайн режимде тааныштырылды.

"Аталган Кырдаалдык борбордо жол чырактарды башкаруу жана жөнгө салуу, кесилиштерден транспорт агымы боюнча статистикалык маалыматтарды чогултуу жана мониторинг жүргүзүү боюнча иштер аткарылат",-деп айтылат маалыматта.

Белгилей кетсек, долбоор "Sitronics Group" IT-компаниясы менен биргеликте ишке ашырылды.