Казакстандын Кыргызстандан барган продукциянын жүгүртүүсүн чектегени боюнча маселе парламентте көтөрүлдү 

Бүгүн, 13-мартта Жогорку Кеңештин кезектеги жыйынында эл өкүлү Кубанычбек Самаков Казакстандын Кыргызстандан барган продукциянын жүгүртүүсүн чектегени боюнча маселени көтөрдү.

Депутат бул ыкчам реакция кыла турган маселе экенин белгилеп, Министрлер кабинети чара көрбөсө экономикага терс таасири тийиши мүмкүн экенин айтты.

"Кечээ күнү ЖМКларда Казакстандын Соода министрлиги 1-июлдан тартып, Кыргызстанда лицензияланган товарларды сатууга, колдонууга бөгөт коё турганы боюнча маалымат жарыяланды. Эгерде ал токтом кабыл алына турган болсо, Кыргызстандын жалпы экономикасына, соодагерлерине, бизнесмендерине, инвестицияга чоң залакасын тийгизип калчу нерсе. Ошондуктан тиешелүү органдардын бул боюнча маалыматын угуп койсок туура болмок. Анткени биз чара көрүп, өзүбүздүн сунушубузду айтып калбасак, экономикага таасирин тийгизет", - деди Самаков.

Эскерте кетсек, буга чейин "Казинформ" агенттиги үстүбүздөгү жылдын 1-июлунан тарта Казакстан Кыргызстанда лицензиясы бар продукцияны жүгүртүүгө, чыгарууга тыюу сала турганын жазган.