Улан Ниязбеков Венада өтүп жаткан баңгизаттар боюнча комиссиянын 67-сессиясына катышууда

Ички иштер министри Улан Ниязбеков Австриянын борбору Вена шаарында өтүп жаткан баңгизаттар боюнча комиссиянын 67-сессиясына катышууда. Бул тууралуу бүгүн, 15-мартта мекеменин басма сөз кызматынан кабарлады.

Маалыматка ылайык, иш-чаранын жүрүшүндө баңги коркунучу менен күрөшүүдө эл аралык өз ара аракеттенүүнү бекемдөөнүн учурдагы абалы жана андан аркы кадамдары талкууланып, синтетикалык баңгизаттардын таралышына каршы турууда Борбордук Азиянын ролу баса белгиленди. Анда Ниязбеков глобалдык, аймактык жана улуттук деңгээлдеги өз ара аракеттенүү процесстерине көмөктөшүүгө даяр экендигин билдирди.

2024-жылы Баңгизаттар боюнча комиссия (CND) баңгизатка каршы саясат боюнча бардык эл аралык милдеттенмелердин аткарылышын баалоо үчүн орто мөөнөттүү текшерүү жүргүзүүдө. 14-15-март күндөрү өткөрүлгөн жогорку деңгээлдеги жыйындардан кийин беш күндүк кезектеги сессия өткөрүлөт.

Белгилей кетсек, иш сапардын алкагында БУУнун Баңгизаттар жана кылмыштуулук боюнча башкармалыгынын жетекчилиги, Орусиянын ички иштер министри жана ишкерлер чөйрөсү менен бир катар эки тараптуу жолугушуулар мерчемделген.