"Крокус Ситидеги" теракт: Тажикстан билдирүү жасады

Коңшу Тажикстандын Тышкы иштер министрлиги Москвадагы теракт болгон Крокус Сити Холлдогу окуяга тажик жарандарынын катыштыгы бар деген маалымат тараганына байланыштуу маалымат каражаттарына кайрылды.

"Москвадагы «Крокус Сити» концерттик комплексинде болгон террордук актка байланыштуу, биз тажикстандык жарандардын болжолдуу катыштыгы бар деген маалыматты таратууга жоопкерчиликтүү мамиле кылуу зарылдыгына көңүл бурабыз", - деп айтылат ишемби күнү ведомствонун телеграм-каналында жарыяланган кайрылууда.

Тажик тарап бул ишке Тажикстандын жарандарынын катыштыгы бар деген маалымат боюнча Орусиянын расмий бийлигинен ырастоо ала элек экендигин баса белгиледи.

"Ушуга байланыштуу Орусиянын мамлекеттик органдары тараткан расмий маалыматка таянууну суранабыз. Текшерилбеген жана ишенимсиз маалыматтарды таратуу учурда өлкөнүн чегинен тышкары жүргөн Тажикстандын жарандарына зыян алып келерин эске алуу керек", — деп айтылат документте.

Буга чейин BAZA телеграм каналы террорчулар отурган делген ак түстөгү Renault унаасы Брянск облусунан токтотулуп, унаанын ичиндеги эки адам кармалганын кабарлаган. Аталган канал ошондой эле кармалгандар Тажикстандын жарандары экенин кошумчалаган.