Өлкөдө балдарды 1-класска электрондук каттоо 8-апрелде башталат

2024-2025-окуу жылына карата балдарды 1-класска электрондук каттоо 8-апрелде башталат. Бул тууралуу Билим берүү жана илим министрлигинен кабарлашты.

Маалымдалгандай, электрондук каттоо автоматташтырылган маалыматтык система аркылуу эки этап менен жүргүзүлөт.

Алсак, биринчи этап жашаган же катталган жери боюнча 8-апрелден 2-июнга чейин, экинчи этап анык жашаган жери боюнча 3-июндан 30-августка чейин созулат.

Ал эми ата-энелер балдарды 1-класска онлайн режиминде mektep.edu.gov.kg платформасында каттайт.

1-класска кирүү үчүн төмөнкү документтер тапшырылат:

– баланы жалпы билим берүү уюмунун 1-классына кабыл алуу жөнүндө ата-энелеринин/ мыйзамдуу өкүлдөрүнүн биринин арызы;

– баланын жана ата-энелеринин/ мыйзамдуу өкүлдөрүнүн биринин инсандыгын ырастоочу документтери: мыйзам чегинде белгиленген тартипте баланы жалпы билим берүү уюмунун 1-классына аныктоо үчүн баланын туулгандыгы тууралуу күбөлүгү жана ата-энелеринин/ мыйзамдуу өкүлдөрүнүн биринин паспорту же электрондук кызмат көрсөтүүлөрдүн “Түндүк” мамлекеттик порталы аркылуу;

– ден соолугунун абалы жөнүндө медициналык маалымкаттын түп нускасы (белгиленген формалар);

– баланын туулгандыгы тууралуу күбөлүгү жана ата-энесинин биринин паспорту, же болбосо мыйзамда белгиленген тартипте баланы 1-класска аныктоо үчүн электрондук кызмат көрсөтүүлөрдүн “Түндүк” мамлекеттик порталы аркылуу;

– алынган эмдөөлөр жөнүндө медициналык маалымкаттын түп нускасы (белгиленген формалар);

– баланын 3х4 өлчөмүндөгү сүрөтү.