Токтогулда экстремисттик материалдарды таратып жүргөн жаран кармалды

Токтогулда "Хизб ут-Тахрир аль-Ислами" уюмунун материалдарын таркатып жүргөнгө шектелип 44 жаштагы жаран кармалды. Бул тууралуу бүгүн, 29-мартта Жалал-Абад ОИИБинен билдирди.

Маалыматка ылайык, милицияга Токтогул районунда 44 жаштагы тургун экстремисттик материалдарды таратып жүргөндүгү боюнча маалымат түшкөн.

Бул факты боюнча Кылмыш-жаза кодексинин 332-беренесине (Экстремистик материалдарды даярдоо жана таратуу) ылайык кылмыш иши козголгон.

Жалал-Абад облусунун аймагында өткөрүлүп жаткан "Экстремист" операциясы учурунда жогорудагы кылмыш ишинин бети ачылып, шектүү делген Токтогул районунун тургуну 1980-жылы туулган С.Р. кармалган. Текшерүүдө андан 1 даана уюлдук телефон, 8 даана диск жана "Фейсбук" аккаунтунан шек жараткан материалдар аныкталып, алынган.

Дайындалган дин таануу экспертизалардын корутундусуна ылайык, интернет тармагы аркылуу башкалар менен бөлүшкөн материалдар өлкө аймагында ишмердүүлүгүнө тыюу салынган "Хизб ут-Тахрир аль-Ислами" уюмуна таандык материалдар экендиги, ал эми DVD дисктерде сот тарабынан тыюу салынган Александр Тихомировдун (Саид Бурятскийдин) үгүт материалдары экендиги такталган.

Убактылуу кармоочу жайга киргизилген шектүүнүн баш коргоо чарасы 28-мартта Токтогул райондук сотунда каралып, үй камагына чыгарылган.

Учурда тергөө амалдары жүрүүдө.