Депутат: "Техникалык көзөмөл кызматы ЖЭБде жарылуу болорун алдын-ала эскерткен"

Бүгүн, 11-апрелдеги Жогорку Кеңештин жыйынында депутат Чыңгыз Ажыбаев Техникалык көзөмөл кызматы Бишкек Жылуулук электр борборунда авария болушу мүмкүн экенин алдын-ала эскерткенин билдирди.

Анын айтымында, Энергетика министрлиги эскертүүнү укпай койгон.

"ЖЭБде авария болгонго чейин бир канча жолу эскерткен экен, "бул жагыңарды карагыла, ушул жерде авария болот" деп. Бирок министрликке көз каранды болгондуктан эч ким укпай койгон. Эртең дагы башка калдык сактоочу жайлар да эскертүүнү укпай койсо, чоң катастрофа жаралышы мүмкүн. Ошондуктан Техникалык көзөмөл кызматын өзүнчө бөлүшүбүз керек" , - деди Ажыбаев.

Буга чейин парламенттин 8-апрелдеги жыйынында эл өкүлү Кубанычбек Самаков ЖЭБди жарылуу болгонго чейин текшергендер жоопко тартылышы керектигин айткан.