Селден жабыркагандарга мамлекет тарабынан жардам көрсөтүлөт

Селден жабыркагандарга жардам көрсөтүлөт. Бул тууралуу бүгүн, 23-апрелде президенттин маалымат катчысы Аскат Алагөзов билдирди.

Анын айтымында, акыркы күндөрү жааган жамгырдан улам Кыргызстандын бир катар аймактарынын бир нече айылдарында сел жүрдү. Айрым кооптуу делген айылдардан жергиликтүү тургундар убактылуу көчүрүлүп кетүүдө.

"Селдин кесепетинен турак жайлар, короо жайларга зыян келтирилген учурлар бар, бирок бул масштабдуу мүнөзгө ээ эмес экен.

Башкача айтканда, ӨКМ, Транспорт жана коммуникация министрлиги жана башка мамлекеттик түзүмдөрдө селдин кесепеттерин жоюуга күчү, техникалык каражаттары жетиштүү", - деп айтылат маалыматта.

Президент Садыр Жапаровдун тапшырмасына ылайык, селдин жүрүшүнөн келтирилген зыяндын көлөмү Өзгөчө кырдаалдар министрлиги тарабынан такталып чыккан соң жарандарга тийиштүү жардам көрсөтүлөт.