Кара-Сууда 3 жаран сабалып, ооруканага түшкөн. Шектүүлөр кармалды

Кара-Сууда адам ден соолугуна оор залал келтирүүгө шектелген жарандар кармалды. Бул тууралуу бүгүн, 30-апрелде Ош ОИИББинен билдирди.

12-апрелде милицияга 1990-жылы туулган И.Б., 1995-жылы туулган А.у.Б. жана 1996-жылы туулган Ж.А. аттуу жарандар денелеринен жаракат алып, аймактык ооруканага жаткырылгандыгы тууралуу маалымат түшкөн. Окуя болгон жерге тергөө тобу барып, жабырлануучуларга соттук-медициналык экспертиза дайындалган.

"Жабырлануучулар Кара-Суу шаарындагы парктардын бирин оңдоп жаткан учурда бир топ белгисиз балдар аларды ур-токмокко алганы белгилүү болду", - деп айтылат маалыматта.

Ага ылайык, топтолгон материалдын негизинде Кылмыш-жаза кодексинин 130-беренеси (ден соолукка оор залал келтирүү), 131-беренеси (ден соолукка анча оор эмес залал келтирүү) боюнча кылмыш иштери козголгон.

Шектүү катары Кара-Суу районунун 2004-жылы туулган К.С., 2005-жылы туулган К.Ф., 2001-жылы туулган М.И., 2006-жылы туулган Ж.М. аттуу тургундары камакка алынды.

Учурда окуяга тиешеси бар башка атуулдарды аныктоо иштери жүрүүдө.